نصائح عامة لـ طلبة الثانوية الأزهرية

#نصائح_عامة لطلبة #الثانوية_الأزهرية
#سنة_تالتة_بشكل_عام

الشرعى ثم العربى ثم العربى ثم الشرعى 😄
طبعًا الكل بيتعك فى الرياضيات -خاصة- وباقى المواد الثقافية ،، ومبيديش الشرعى والعربى حقُّهم
■ بيعتمد على إنه ممكن يذاكرهم قبل الامتحان بيومين (أو حتى شهر) ويقفّل فيهم زىّ السنوات السابقة، لكن الكارثة اللى أنت مش مُدركْها إن اختبارات الشرعى والعربى زمان كانت سهلة وبسيطة،،
وبالتالى هتقابلك قُنبلة مُدوَّية لما تشوف الامتحان آخر السنة -خاصة للطلبة اللى بتذاكر مرة واتنين وعشرة، من غير ما تحل-
وتُفاجَأ بإن اختبارات الشرعى والعربى من أصعب ما يكون، وبيكون فيها كمية أسئلة تفكير وربط بين المواضيع -أه تفكيــــــــــر فى الشرعى والعربى :/ -
عشان كده لازم تخلّصهم من أوّل السنة عشان يتراجعوا ويتحل عليهم ويتهضموا كويس

★#نظام_المُذاكرة:التسميــع لأيّ حد أودّامك، عشان يصلّح أيّ خطأ عندك بسرعة وكمان عشان تكون مركّز (لأن نظام الورقة والقلم ممكن تكون بتكتب وأنت سرحان أه، إنما بتسمّع وأنت سرحان صعبة شوية ولو حصل فده دليل على قوة مذاكرتك)
غير إن السمع عامةً أقوى حاسّة بدليل تقدّمها فى آيات القرآن، وبدليل أن لو قرأت أغنية مرة واتنين وعشرة مش هتحفظها زى أمّا تسمعها مرتين فى توكتوك وليكن 😄 -مع الاعتذار لدنوّ المثل-

¤ كل درس تخلّصه حفظ تحل عليه -فورًا- من كتب تدريبات الامتياز والامتحانات السابقة وتمرينات كتاب المدرسة
_____________________________________________________
◆ لازم مراجعة دوريّة على المواد كلها، لأنك أكيد لما هتذاكر هتنسى

● طب أراجع #الفقه إزاى ؟؟
هتذاكر الأسبوع ده باب وبعده مثلا باب واللي بعدهم باب .. بحيث تلاقى نفسك مخلص أربع أبواب
تروح وأنت بتذاكر الباب الخامس تراجع الأول {تسميـع+حل} ... وأنت مع السادس تراجع الأول والثانى {تسميـع+حل} و هكذا ...
*طبعا لاحظت كده إن الأبواب الأخيــرة هيتراجع عليها قليل عشان كده لازم تخلّص المنهج بدرى عشان ياخدوا حقُّهم

● طب أراجع #الحديث إزاى ؟؟
نفس نظام الفقه ولكن خليها بــالخمس عشر أحاديث عشان لازم تكون مُتقِن تمامًا للأحاديث كُلَّها .. لا تضيّع الأول ولا الآخر،
السبب: الحديث أعلى درجة (أعلى من الإنجلش أصلا😳) ولازم تكون مُتقِنُه عشان تقدر تجاوب فى الشفوى بـثقة وبدون ارتباك !

● طب #التفسيـر؟؟
بالسورة ،، وتوقّع إنك مش هتبقى حافظه كويّس (وهتقول عليه أصعب من الفيزياء، لأن المعانى مُتقاربة لـلغاية وفيه كلمات مُتشابهة كتيــر هتكتشفها بـنفسك)
طب الحل!!
المراجعة الكتيــــــــــــــــرة، وكل ما تبدأ في قطعة من سورة تكون بتراجع قطعة من السورة اللي قبلها
[ أنا خلصته أول مرة تقريبا فى شهر وكان لوحده لأنى كنت مأجلُّه يعنى مُدّة كبيــرة جدًا ،، ابتديت أجيبه تانى تقريبا أخد أربع أيّام (كل سورة يوم) ثم يومين (كل سورتين يوم) ثم راجعته كلُّه بـ فضل الله فى أربع ساعات]

★ كن على ثقة إن "التكرار بيعلّم الشُطّار" علفكرة مش بيعلّم الحمار! ((لأنه لو كان اتعلّم من التكرار أو غيره مكنش بقى حمـار 😄 ))

● #التوحيـــــد: ألذ وأخف مادّة
يا ريت تراجعه بالمنهج 😤 لأن مفهوش تداخل وسهل وخفيف ....
التفسير خفيف كمان بس فيه تداخل عشان كده ميُنصحش إنه يتراجع مرة واحدة إلا بعد كمال الإتقــان

●●● #النحو، #الصرف، #البلاغة:
الأهم فيهم الحَل ثم الحَل ثم الحَل، حَل مُكثّف بغزارة بغباوة 😂 من كتاب تدريبات الامتياز والامتحانات السابقة وأي مصدر تقع عليه عينك
لأنهم من 2013 ودائمًا وأبدًا فيه أسئلة مش مباشرة وعاوزة فهم وممارسة سابقة

● #الأدب_و_النصوص : زي الفقه بالظبط #مادة_حفظ عاوزة مراجعة كذا مرة 😠

● (كيمياء - فيزياء - أحياء)
بعد ما تفهم الدرس
- خلّص تدريبات كتاب واحد (الامتحان بلا مُنافِس)
- حل عالدرس اللي ذاكرته من الامتحانات (يعني تلقّط من الامتحانات الأسئلة اللي عالدرس اللي خلّصته) عشان بعد ما تخلص المنهج تلاقيك خلصت الامتحانات على مدار السنة
وتكون ساعتها بتحلها كاملة للمرة الثانية بس المرادى بتحل الامتحان كامل على بعضه :)____________________________________________
◆ آخد مع مين دروس؟
المُدرّس اللى تاخد معاه درس يكون بيعمل التالي:
1) يديك واجب ولازم يكون شادد عليه
2) بيعمل امتحانات شاملة وكل أوّل حصة
3) بيخليك تحل فى الحصة
- وفي الثقافي: ابعد عن الأساتذة الأُوفر ... أه الأستاذ الأوفر اللى بيديك الحصة فى وقت أُوفر ....
هتلاقى أساتذة بتدّى الحصة في خمس ست سبع ساعات وواجب يتحل فى يومين!!
لأن #الأزهرى أكتر واحد المفروض يبعد عن تضييع الوقت فى اللى ميخصّهوش ...

>يعنى أنت علمي، والرياضيات عندك أقل من 10% من مجموعك .... والشرعى والعربى أكتر من 60% من مجموعك ... هل يُعقَل إنك تضيع يومين فى الأسبوع تروح فيهم الدرس وأربعة تحل فيهم الواجب؟؟!! عشان الـ 10% ؟؟؟ ....
> طب هل يُعقَل تُقعد فى حصة كيميا ست ساعات !!! حتى لو بيقول حاجات مُفيدة !
بل بالعكس أنت لو الست ساعات دول قعدتهم فى بيتك وذاكرت بـصفاء ذهن وراحة بال هتوصل للى كان المستر هيقوله بـ نفسك بس صعب يروح من دماغك [ Easy come Easy go ]

★ في الأول وفي الأخر أنت الفيصل ومجهودك الذاتي ومذاكرتك الشخصيّة وحفظك للدرس، يامَا أساتذة شاطرة عندها طلبة مبتجيبش درجة كويسة والعكس... 😉😉

________________________________________

#الزتونة :

1) ذاكر

2) حل التدريبات مع حل أجزاء من الامتحانات الموافقة للدرس اللى أنت لسه مذاكره

يعنى تمسك الامتحان تمر عليه بعينك تشوف إيه الأسئلة اللى جات على الجزء اللى أنت مذاكره وتحلّها، وطبعًا أنت بكده من غير قصد بتقرأ الأسئلة اللى عالأجزاء اللى لسه هتذاكرها فيما بعد و بكده بتكتسب معرفة سابقة وخبرة أنك أديك عرفت السؤال بييجى إزاى؟ 👍

3) راجع

4) حل امتحانات كاملة ..

[في الثقافي: أزهر وعام ... والأهم الأزهر ثم الأعوام الأخيرة من العام 2016 > 2015 > 2014 >2013 وهكذا]

[في الشرعي والعربي: علمي وأدبي]

https://www.facebook.com/dr.abotaleb98/posts/923739197716079

_______________________________________

للمزيد: تابع بيدج "الثانوية الأزهرية التعليمية"

https://www.facebook.com/Thanawy.Azhari